တေမိဇာတ် ခင်းမိခြင်း အကြောင်း

ပတ်ဝန်းကျင်ဆိုတဲ့စကားက ကျွန်မအတွက် တော်တော့်ကို နားလည်ရခက်တဲ့ ဘာသာစကားတစ်ခု။
ပတ်ဝန်းကျင်ဆိုတဲ့ အနက်အဓိပ္ပါယ်ကို ကျွန်မ သေချာမသိပေမဲ့
ပတ်- ပတ်လည်-
ဝန်း- ၀ိုင်းဝန်းနေသော-
ကျင်- ကျင်လည်ရာနေရာတစ်ခု- လို့ အမျိုးသားစာရေးဆရာတစ်ယောက်ရဲ့ စာပေထဲမှာ မှတ်သားခဲ့ဖူးတယ်။
ကျွန်မ စဉ်းစားကြည့်တယ်။
နေရာတိုင်းမှာ ပတ်ဝန်းကျင်ဆိုတာရှိတယ်။
လူတွေမှာလဲ လူ့ပတ်ဝန်းကျင်ဆိုတာရှိသလို တိရစ္ဆာန်တွေလဲ ရှိမှာပဲ။
ဘယ်နေရာ ဘယ်ဒေသမှာပဲဖြစ်ဖြစ် မိမိတို့ နေထိုင်ရာမှာ ပတ်ဝန်းကျင်ဆိုတာ ရှိနေတယ်။
ဒါပေမဲ့ ကျွန်မနေထိုင်ရာ အိမ်ပတ်ဝန်းကျင်မှာ စံပယ်ပင် ပိတောက်ပင် စိန်ပန်းပင် စတဲ့ သက်ရှိအပင် ပတ်ဝန်းကျင်ကိုတော့ ကျွန်မ အလွန်နှစ်သက်မိပါရဲ့။
ကျွန်မအိမ်ရဲ့ ဘေးအိမ်တွေမှာနေထိုင်တဲ့ သက်ရှိလူ့ပတ်ဝန်းကျင်ကိုတော့ ကျွန်မ မလိုလားမိဘူး။


"အစ်မ.. စံပယ်ပန်းလေးတစ်ပွင့်နှစ်ပွင့်ေ

လာက်ခူးမယ်နော်.."
တစ်နေ့ ကျွန်မ ခြံထဲတွင် စာရေးစားပွဲခုံချပြီးစာရေးနေတုန်း အိမ်ဘေးက မိထက်ဆိုတဲ့ ဆယ်တန်းဖြေပြီးခါစ ကောင်မလေးတစ်ယောက်ရောက်လာပါတယ်။ ဆယ်ကျော်သက်အရွယ်ဆိုတဲ့အတိုင်း မျက်စိကအစ ဂနာမငြိမ်ချင်ဘူး။
ကျွန်မခြံထဲဝင်ပြီး စံပယ်ပန်းတောင်းတာကနဲနဲ ကျွန်မအိမ်ထဲကိုလှမ်းကြည့်ပြီးစပ်စုတာက များများ။
ကျွန်မကိုယ်တိုင်လဲ မစပ်စုသလို စပ်စုတာလဲမကြိုက်။
"အိမ်မှာခင်ပွန်းသည်က ရုံးသွားလို့မရှိဘူး ညီမလေးရဲ့... အကူခေါ်ထားတဲ့ကောင်မလေးကတော့ ဟင်းချက်နေတယ်..."
ကျွန်မလဲ ရွဲ့ပြီး အဲလိုပြောလိုက်ရော ကျွန်မကို အရှက်ပြေ ရယ်ပြပြီး စံပယ်ပန်းတွေခူးပြန်တယ်။ တောင်းတော့ဖြင့် တစ်ပွင့်နှစ်ပွင့်။ ခူးလိုက်တာ ၁၀ပွင့်ထက်မနည်း။ ထားပါတော့လေ။
"အစ်မကျေးဇူးနော်.."
"သြော်.. အေး.. အေး..."
"ဒါနဲ့ အစ်မ စာချည်းပဲရေးမနေနဲ့.. ပတ်ဝန်းကျင်လေးဘာလေးလေ့လာဦး..အဟဲ.. ညီမ စေတနာနဲ့ပြောတာပါ.."
ကြည့်ပါဦး။ သူများအိမ်လာပြီး ပန်းတွေခူးသေးတယ်။ သူများကိုလဲ ဆရာလုပ်သွားသေးတယ်။ ကိုယ်ကမွေးရင်ကိုယ့်သမီးအရွယ်လောက်ရှိမဲ့ဒီကလေးမက ကိုယ့်ကိုပြန်ပြီး ပညာပြသွားပါလား။
အဲဒါကြောင့် ကျွန်မ .. ကျွန်မ ပတ်ဝန်းကျင်ကလူတွေနဲ့ မပတ်သက်ချင်တာ။ သူတို့နဲ့စကားပြောလို့ ကျွန်မ စိတ်အနှောင့်အယှက်ပဲဖြစ်ရတယ်။
အခုလဲစာရေးချင်တဲ့စိတ်ပျောက်သွားတယ်။
အဲဒါနဲ့ ကျွန်မလဲ စာဆက်မရေးတော့ပဲ ပစ္စည်းတွေသိမ်းပြီး အိမ်ထဲဝင်လာလိုက်တယ်။
"မင်းကိုက အတွေးလွန်နေတာ... မင်းဟာလေ စိတ်ကူးယဉ်စာရေးဆရာမပီပီ နေရာတကာကို လိုက်ခံစား...  အရည်မရ အဖက်မရ စိတ်ကူးတွေယဉ်...  စာတွေရေး... ပြီးတော့ သူများအပေါ်လဲ မင်းပေတံကြီးနဲ့ လိုက်လိုက်တိုင်းတယ်..."
ဒါကတော့ ကျွန်မ အမျိုးသားက ကျွန်မကို အမြဲဝေဖန်လေ့ရှိတဲ့ သူ့စကားလုံးတွေပါ။
သူကတော့ လက်တွေ့သမားပီပီ စိတ်ကူးယဉ်တာကိုမနှစ်သက်သလို စာရေးတဲ့စာရေးဆရာတွေကိုလဲ အထင်မကြီးတတ်တဲ့သူပါ။
"မင်းတို့ စာရေးဆရာတွေက သူများတွေကိုသာဟိုလိုလုပ် ဒီလိုလုပ် ဆိုပြီး သိပ်ပြောတတ်တယ်.. ကိုယ်တိုင်ကျတော့ ကောင်းအောင်မနေတတ်ကြဘူး.... ယောက်ျားလေးစာရေးဆရာတွေဆိုလဲကြည့်ပါလား.. ဘီယာသမားနဲ့ အရက်သမားတွေချည်းပဲ.. "
ဟင်းးးး... သူနဲ့သာ ပြိုင်ငြင်းနေရင် ကျွန်မ မောရုံပဲရှိမယ်။ သူပြောသမျှကို ကျွန်မ ဘာမှပြန်မပြောပဲနေလိုက်တယ်။
သူ့လို စာပေတန်ဖိုးမသိတဲ့သူတစ်ယောက်နဲ့ ကျွန်မဘာလို့ အချိန်ကုန်ခံငြင်းနေမလဲ။
ကျွန်မအချိန်တွေကို စာရေးခြင်းနဲ့စာဖတ်ခြင်းမှာပဲ အသုံးချဖို့ ကျွန်မ အမြဲလုပ်ဆောင်တယ်။
သူပြောသလို ကျွန်မဟာ တကယ်ပဲ စိတ်ကူးယဉ်သမားဖြစ်နေလား။
အရာရာကိုပေတံနဲ့လိုက်တိုင်းနေမိသလား။
သေချာတာကတော့ ကျွန်မနဲ့ ကျွန်မ့ပတ်ဝန်းကျင်မှာအဆင်မပြေသလို ကျွန်မရဲ့အိမ်ဦးနတ်နဲ့လဲ ကျွန်မ အဆင်မပြေပါဘူး။

ကျွန်မ တကယ်ပဲ အတွေးလွန်နေသလား။
ကျွန်မ က အေးအေးဆေးဆေးပဲနေချင်သူတစ်ယောက်။
ပတ်ဝန်းကျင် ရပ်ကွက်ထဲကလူတွေလို လက်ဖက်လေးစားလိုက် ရေနွေးလေးသောက်လိုက် အတင်းလေးပြောလိုက် မလုပ်ချင်သလို ကျွန်မအပေါ် ဝေဖန်တာမျိုးကိုလဲ ကျွန်မ မကြိုက်မနှစ်သက်မိဘူး။
စာပေနဲ့ပတ်သက်လို့ ကျွန်မအပေါ် ဝေဖန်တာမျိုးကို ကျွန်မလက်ခံတယ်။
ဒါပေမဲ့ အရည်မရ အဖက်မရ ဟိုစပ်စပ် ဒီစပ်စပ် တစ်စိတ်ကိုတစ်အိတ်ချဲ့ပြောတာတွေ မဟုတ်တာကို အဟုတ်ဖြစ်အောင် ပြောတာတွေတော့ ကျွန်မ မကြိုက်ဘူး။
ဒါကြောင့်မို့လို့လဲထင်ပါရဲ့။ ရပ်ကွက်ထဲကလူတွေကျွန်မကို နာမည်ပေးထားတယ်။ မာနအိုးကြီး တဲ့။
ကျွန်မ ကိုယ် ကျွန်မတော့ မာနကြီးတယ် မထင်ဘူး။
အေးအေးဆေးဆေးနေတတ်တာရယ် စကားသိပ်မပြောဖြစ်တာရယ်ပဲရှိတယ်။
လူတွေနဲ့ သိပ်ပြီး အရောမ၀င်ချင်တာက မာနကြောင့်မဟုတ်ခဲ့ဘူး။
ဒါကို ပတ်ဝန်းကျင်က လူတွေက ထားပါတော့။ ကျွန်မ အမျိုးသားကိုယ်တိုင် ကျွန်မအပေါ် နားမလည်နိုင်ပါဘူး တဲ့လေ။
ဟုတ်တော့လည်းဟုတ်ပါတယ်။
စာတွေကို ဖွဲ့ဖွဲ့နွဲ့နွဲ့ရေးတတ်ပေမဲ့ စကားကို သေချာမပြောတာက ကျွန်မ အားနည်းချက်လို့ဆိုမလား။
ဒါမှမဟုတ် ကျွန်မကပဲ အရာရာကို လိုက်ခံစားနေမိလို့လား။

"ညီမရေ.. အစ်မတို့ရပ်ကွက်မှာ ဆွမ်းလောင်းပွဲရှိတယ်လေ။ ၀ိုင်းကူလုပ်ဖို့ လူလိုက်စုနေတာ။ ညီမစာရေးနားတဲ့အချိန် ညီမစိတ်ဝင်စားရင်ပေါ့။"
ကျွန်မတို့ရပ်ကွက်ရဲ့လူကြီးရဲ့ မိန်းမကိုယ်တိုင် အိမ်လာပြီး ပြောလာတဲ့စကားကို ကျွန်မ မငြင်းပယ်ချင်ဘူး။
အမြဲတမ်း စာဖတ်နေလို့စာရေးရလို့ မအားဘူးဆိုပြီးငြင်းပယ်ခဲ့ပေမဲ့ ဒီတစ်ခါ ကျွန်မ အမျိုးသားက
"မင်းကို ထက်မြက်တဲ့ မိန်းမတစ်ယောက်အဖြစ်မြင်စေချင်တယ်။ ပေါင်းသင်းဆက်ဆံရေးကောင်းတဲ့သူဖြစ်စေချင်တယ်။ အသက်မဲ့နေတဲ့ဒီစာအုပ်တွေကြားထဲမှာ နစ်မွန်းနေတဲ့သူအဖြစ် မမြင်စေချင်ဘူး။
မင်းနဲ့ကို ကတိထားကြတယ်လေ။ တစ်ယောက်ဆန္ဒကိုတစ်ယောက်လိုက်လျောဖို့။ အခု ကိုယ်ဖြစ်စေချင်တဲ့ဆန္ဒကလဲ မင်းအတွက် ထိခိုက် မနစ်နာလောက်ဘူးလို့ ကိုယ်ယုံကြည်တယ်။ ကြိုးစားကြည့်ပါဦး မိန်းမရာ.."
ဆိုပြီး ကျွန်မကို လွန်ခဲ့တဲ့တစ်ပတ်လောက်က ပြောထားတဲ့ အမျိုးသား၏ စကားကို ကျွန်မ နားထောင်လိုက်တယ်။
ကျွန်မလို ရပ်ကွက်ပတ်ဝန်းကျင်နဲ့ ကင်းကင်းရှင်းရှင်းနေတဲ့သူတစ်ယောက်အနေနဲ့ ပထမဆုံးအကြိမ်အဖြစ်ရပ်ကွက်ဆွမ်းလောင်းပွဲမှာ ပါဝင်ဖို့ဆုံးဖြတ်လိုက်တယ်။
ဒါပေမဲ့ ကျွန်မ စဉ်းစားမရတာ တစ်ခုက စကားနည်းတဲ့ ၊ ပတ်ဝန်းကျင်နဲ့ သိပ်ပြီးမဆက်ဆံတာနဲ့ပဲ ကျွန်မလိုစာရေးဆရာမတစ်ယောက်က မထက်မြက်တဲ့ ခပ်တုံးတုံး မိန်းမတစ်ယောက်ဖြစ်သွားတယ်တဲ့လား။

"ညီမက ဒီကြက်သွန်တွေ ကို မိထက် တို့နဲ့အတူတူ အခွံနွာနော်.."
လက်ထဲကို ဓားတစ်ချောင်းလာပေးပြီး ထွက်သွားတဲ့ ရပ်ကွက်လူကြီးမိန်းမကို ခေါင်းညိတ်ပြလိုက်တယ်။
ဘေးနားမှာ မိထက်ကတော့ ၀မ်းသာအားရ ပုံစံနဲ့
"အစ်မ အခုလို ရပ်ကွက်သာရေးနာရေးမှာ ၀ိုင်းကူလုပ်တာ အရမ်းဝမ်းသာတာပဲ.. သိလား.. ငါ့အစ်မ တော်လာပြီ.."
တဲ့။
ဘယ်လိုစကားမျိုးကြီးလဲ မသိပါဘူး။ ဒါပေမဲ့ ကျွန်မ ဘာမှ မပြောပဲ ကြက်သွန်တွေခွါနေမိတယ်။ ဘေးနားမှာ ငရုတ်သီးထောင်းသူ ကြက်သွန်လှီးသူ နဲ့ အခြားအလုပ်တွေကိုယ်စီလုပ်နေတဲ့ မိန်းမတချို့က ကျွန်မကို နေကောင်းလား ဘာညာဖြင့်စကားလှမ်းပြောတယ်။
ကျွန်မလဲ အလိုက်သင့်ပြန်ပြောလိုက်တယ်။ တချို့ကျတော့ ကျွန်မကို စကားမပြောပဲ မသိမသာအကဲခတ်တယ်။
ကျွန်မကတော့ အေးအေးဆေးဆေးပဲ လုပ်စရာရှိတဲ့အလုပ်တွေလုပ်ရင်း အားလုံးပြီးဆုံးလို့ လူတွေပြန်တော့မယ်လဲ ဆိုရော ကျွန်မလဲ အိမ်ပြန်ခဲ့လိုက်တယ်။

နောက်တစ်နေ့မနက်ခင်း ထမင်းစားခန်းထဲ အမျိုးသားအတွက် မနက်စာပြင်ဖို့ အိမ်အကူကောင်မလေးကိုညွှန်ကြားနေရင်း ကောင်မလေးက ကျွန်မကိုတစ်ခုခုကိုပြောချင်နေမှန်းသိတာနဲ့
"ဘာကိစ္စရှိလို့လဲ.. တစ်ခုခုပြောချင်နေသလိုပဲ.. ပြောလေ.. ငွေကြိုထုတ်ချင်လို့လား.."
"မဟုတ်..မဟုတ်ဘူး..မမ.. ဒီလိုလေ.. သမီး ဈေးသွားရင်းကြားခဲ့တာလေ.. အဲဒါ.."
"ဘာကြားခဲ့တာလဲ.."
ထမင်းစားခန်းထဲဝင်လာတဲ့ အမျိုးသားက ကျွန်မ အစားလှမ်းမေးလိုက်ခြင်းဖြစ်ပါတယ်။
"ဟိုလေ.. ဟို.. မနေ့က မမ သူတို့နဲ့ဝိုင်းကူလုပ်ပေးတယ်မဟုတ်လား.. အဲဒါကိုသူတို့က...
မာနအိုးကြီးတစ်ယောက် သူ့ယောက်ျားက စမောလေးနဲ့ ဖောက်ပြန်နေလို့စိတ်တွေညစ်နေတာနဲ့ စိတ်ပြေလက်ပျောက် လာလုပ်ပေးတာနေမှာပဲတဲ့.. နိုိ့မို့ဆို မလာဘူး တဲ့.. အခုလိုမျိုးဖြစ်တော့မှ ရပ်ကွက်ကို အားကိုးပြီး တိုင်ပင်ချင်လို့ အင်ထရိုစ၀င်ပြီး ရပ်ကွက်ထဲက အလုပ်တွေ ၀ိုင်းလုပ်ပေးတာ နေမှာပေါ့ တဲ့..
အဲလိုပြောတယ် မမ.."
ကောင်မလေးရဲ့ စကားသံအဆုံး ကျွန်မအမျိုးသားလဲ
"ဟေ.."
ဆိုပြီး အံ့သြတဲ့မျက်နှာမျိုးဖြစ်သွားတယ်။
ကျွန်မလဲ အမျိုးသားမျက်နှာကိုကြည့်လိုက်တော့ သူက-
"မဟုတ်ဘူးနော်.. မိန်းမ.. ကိုယ့်ကိုအထင်မလွဲနဲ့ .. ကိုယ်က စီးပွားရေးလုပ်မယ် ပိုက်ဆံရှာမယ်ပဲစိတ်ကူးရှိတာ. ကိုယ့်စိတ်ကို မိန်းမ အသိဆုံးနော်.."
ဟု ပြာပြာသလဲပြောပါတယ်။
ကျွန်မ ဘာမှ မဖြစ်သလို မျက်နှာမျိုးနဲ့ အေးအေးဆေးဆေးနေလိုက်တယ်။ အကူကောင်မလေးကိုလဲ လုပ်စရာရှိတာဆက်လုပ်။ ဈေးသွားရင်လဲရပ်ကွက်ထဲကလူတွေကိုသိပ်အရောမ၀င်ဖို့ ပြောလိုက်တယ်။
ကျွန်မနဲ့အမျိုးသားနဲ့ စားပွဲမှာအတူတူထိုင်ပြီး မနက်စာစားနေလိုက်တယ်။ စားနေရင်း အမျိုးသားက-
"မိန်းမ..... နောက်ဆို ရပ်ကွက်ထဲက လူတွေနဲ့ အရောမ၀င်နဲ့ကွာ. ကိုယ်မကြိုက်ဘူး.. သိလား.. ဟုတ်တာလဲ မဟုတ်ဘူး.. လျှာအရိုးမရှိတိုင်းပြောနေတာ။မိန်းမက စာရေးဆရာမပဲ ..အိမ်မှာပဲ အေးအေးဆေးဆေးစာရေးနေ.. စာများများရေး.. မိန်းမ အတွက် ဖတ်ဖို့စာအုပ်တွေလဲကိုယ်ဝယ်လာပေးမယ် သိလား..."
ဆိုပြီးပြောပါတယ်။
ကျွန်မကတော့ ခေါင်းပဲညိတ်ပြမိလိုက်တယ်။
ကျွန်မ အမျိုးသားကိုလဲ ကျွန်မ သံသယမဖြစ်မိပါဘူး။
ကျွန်မအိမ်ထောင်ရေးကို သံသယတွေနဲ့လဲ မတည်ဆောက်ချင်ဘူး။
ဒါကို ကျွန်မ အမျိုးသားကလဲ နားလည်တယ်။
ကျွန်မကလဲ သူ့အပေါ် ယုံကြည်တယ်။
ဒါပေမဲ့ ပတ်ဝန်းကျင်က လူတွေ ဘာလို့ မဟုတ်တာပြောဖို့ အချိန်ရလဲ ကျွန်မ စဉ်းစားမရဘူး။ သူတို့အတွက် ဒီလိုပြောလိုက်ရလို့ ဘာအကျိုးမြတ်ရှိသလဲ ကျွန်မ မသိဘူး။
ကျွန်မ လူတိုင်းကို ခင်တတ်ပါတယ်။ ဒါပေမဲ့ ပတ်ဝန်းကျင်မှာတော့ ကျွန်မတေမိဇာတ် ဆက်ခင်းနေမိမယ် ထင်ပါရဲ့။။။။။

နှင်းဆီက ၀ါသနာပါလို့သာ စာတွေရေးမိတာပါ။ နှင်းဆီစိတ်ကူးထဲကအတိုင်းပုံဖော်ရမှာ အလွဲအလွဲအချော်ချော်တွေဖြစ်မှာ သိပါရဲ့။ ခွင့်လွှတ်ပေးကြပါ။ နှင်းဆီဆိုတာ ၀ါသနာရှင်အဆင့်ထက်တောင် နိမ့်တဲ့ အောက်ဆုံးအဆင့်ကနေ နည်းလမ်းမကျ ဘာမကျနဲ့ စာတွေကို ရူးသွပ်ပြီး ရေးနေသူတစ်ယောက်ဆိုတာ ၀န်ခံပါတယ်။ နှင်းဆီအပေါ် စိတ်ကြိုက်ဝေဖန်နိုင်ပါတယ်။

နောက်ပြီး စာရေးတာကို အထင်မကြီးတဲ့၊ ကဗျာရေးတာကို အထင်သေးတဲ့၊ ဆုံမှတ်လွဲသွားတဲ့သူတစ်ယောက်အတွက် နှင်းဆီခံစားနေရတယ်ဆိုရင် ပတ်ဝန်းကျင်က နှင်းဆီကို ဘယ်လိုဝေဖန်ကြဦးမလဲကွယ်။း)